La decision de Grècia de far un referendum subre lo darrièr acòrdi prepausat per la tròica a pas agradat brica a l’Eurogrop, qu’a barrat la pòrta e que vòl pas contunhar las negociacions amb lo govèrn grèc d’Alexis Tsipras. “Soi negativament estonat per la decision del govèrn grèc, qu’a escartat las darrièras proposicions de las tres institucions”, çò diguèt lo president de l’Eurogrop, Jeroen Dijsselbloem.


Lo govèrn grèc a convocat un referendum lo 5 de julhet venent subre lo darrièr acòrdi prepausat per la tròica

Lo govèrn grèc a convocat un referendum que se farà lo 5 de julhet venent subre lo darrièr acòrdi prepausat per la tròica. Lo primièr ministre Alexis Tsipras o a anonciat dins la nuèch de divendres a dissabte, après mièjanuèch, en un discors televisat. Lo govèrn grèc recomandarà als ciutadans de votar de non.

Divendres Grècia refusèt una ofèrta finala dels creditors, qu’es la que serà somesa al referendum. Los creditors ofrissián de desblocar una partida de l’ajuda en escambi de nòvas retalhadas e d’una pojada de l’IVA (impòst sus la valor aponduda) que lo govèrn grèc considèra impossible d’acceptar. Dissabte una nòva reünion de l’Eurogrop deviá cercar una solucion, mas totes vesián qu’un acòrdi semblava pauc probable.

La situacion es extrèma perque dimars expira lo relambi per que lo govèrn grèc torne 1,6 miliard d’èuros al Fons Monetari Internacional (FMI), un argent que Grècia lo ten pas. 

Divendres, lo primièr ministre grèc, Alexis Tsipras, èra sortit de la cima dels caps d’estat e de govèrn de l’UE en criticant lors sòcis. “Los principis fondadors de l’Union Europèa èran la democracia, la solidaritat, l’egalitat e lo respècte mutual”, çò diguèt lo lidèr de Syriza. “Èran pas lo cantatge ni los ultimatums. Pas degun a drech de metre en perilh aquestes principis”, çò apondèt.
 
Lo president de la Comission, Jean-Claude Juncker, planguèt los metòdes de negociacion amb Grècia, qu’an implicat plusors Eurogrops en pauques jorns, recentament, e mai una cima extraordinària dels lidèrs de l’Eurozòna diluns 15 e divèrsas reünions bilateralas entre lo govèrn d’Atenas e la BCE, l’FMI e la Comission Europèa. “Aquò es pas un metòde de trabalh bon”, çò a criticat lo luxemborgés.
 
 
Immigracion en Mediterranèa

Lo president francés, François Hollande, tanben a avertit que Grècia se tròba sens temps. “Lo temps s’acaba lo 30 de junh”, çò a recordat.
 
Lo francés a admés que la reünion tanben foguèt “tibada” durant las negociacions subre l’immigracion de la Mediterranèa. Los lidèrs dels 28 se son acordats per aculhir pendent los dos ans venents 40 000 refugiats qu’ara meteis son en Grècia e Itàlia, e mai se son acordats per los repartir entre los divèrses estats membres de l’UE. Ça que la, e a la diferéncia de la propòsta iniciala de la Comission, los lidèrs an refusat d’aplicar de quòtas d’immigrants obligatòrias. 

“M’aguèsse agradat que totòm o acceptèsse e que foguèsse obligatòri, mas se lo resultat es lo meteis, perqué me caldriá garrolhar amb los que creson qu’una obligacion se pòt pas far?”, çò a explicat Juncker a la conferéncia de premsa. Segon lo president de la Comission, que los lidèrs se sián meses d’acòrdi “en substància” ja es sufisent.